REVIEWS

حمزة الدين النوبي العالمي

214

حمزة علاء الدين لُقب بـ النوبي العالمي من مواليد توشكى سنة 1929 بس سافر القاهرة بعد م اتبنى السد العالى و غرقت قريته. ساعتها تم تهجير اهالى النوبة من بيوتهم اللى اتولدوا و عاشوا فيها سنين، و ادولهم بدالها بيوت اسمنت في هضبة كوم امبو.

دخل حمزة هندسة القاهرة، و اتخصص في قسم الكهرباء. اشتغل مهندس كهربا فترة، بعد كدة اشتغل في السكة الحديد بس ملقاش نفسه ف شغل الحكومة. حب المزيكا و درس ف الاول موشحات، و بعد كدة ابتدى العزف عالعود و اله التار النوبية.

وقتها دخل حمزة معهد إبراهيم شفيق للموسيقى، و بعد كده معهد الملك فؤاد للموسيقى الشرقية (معهد الموسيقى العربية دلوقتى). و درس العود و الموسيقى العربية، و بعد كدة دخل اكاديمية للموسيقى في ايطاليا، و خد بعدها منحة لدراسة الموسيقى في امريكا، و بعد كدة رجع تانى يعزف العود ف شوارع النوبة.

سافر حمزة تانى امريكا سنة 1964 و عمل البوم اسمه (موسيقى النوبة). و عمل في نفس السنة حفلة في امريكا اتشهرت جدا. و نجح انه يخلى الامريكان يسمعوا العود ويحبوه. وعمل بعديها البوم (الساقية)، الى عمل ضجة ف الوسط الموسيقى الامريكى ساعتها. و ده خلاه بعد كدة يعمل الموسيقى التصويرية للفيلم الامريكى (the black hours).

بعد كدة اشتغل في جامعات امريكية لتدريس المزيكا، زى جامعة أوهايو، جامعة واشنطون و جامعة تكساس. و يعتبر حمزة الدين هو ابو الموسيقى النوبية، بعد مانقذ التراث النوبى من الاندثار، و قدر بفنه انه يوصلها للعالمية.

اتوفى حمزة الدين سنة 2006 بعد تجاهل اعلامى مصرى طول مسيرته الفنية، بعد ما اتشهر بالعود في امريكا و الغرب. بس هيفضل فن حمزة الدين موجود يشهد على عبقرية الموسيقى النوبية.

X