REVIEWS

ديسكو مصر – المزيكا اللي بتدي للحياة طعم

1.97K

المزيكا هي اللي بتدي للحياة طعم، و بتجمع الناس على حبها بكل أنواعها. بس دايماً هنلاقي إختلاف في الآراء، ممكن ناس تفضل الأغاني القديمة الكلاسيكية و كلماتها العميقة، و ناس تانية تحب الأغاني الحديثة علشان إيقاعاتها السريعة و كلماتها السهلة. بس ايه ممكن يحصل لو اتجمعت كل العناصر دي في أغنية واحدة؟ أو مثلا تسمع أغاني مطربك المفضل في فترة التسعينات او الثمانينات بموسيقى إلكترونيك؟.

ده اللي عملوه عمرو عماد و مصطفى الشريف لما جمعهم حب الموسيقى و قرروا يحطوا بصمتهم المميزة عن طريقها. الفكرة جاتلهم لما اكتشفوا إن أغلب الـDJs في مصر بيهتموا بالمزيكا الأجنبية اكتر من العربية، فـ حبوا يتخلصوا من عقدة الخواجة و يرجّعوا الناس تسمع المزيكا عربي تاني عن طريق إعادة توزيعها بطريقة عصرية اكتر، و لأن الزمن الجميل كان زمن الديسكو فـ قرروا يكون إسم الفرقة “ديسكو مصر”.

اللي بيميز ديسكو مصر الروح اللي بتدب في مزيكاتهم عالمسرح عن طريق الـ visuals اللي بتكون وراهم و بتتحرك بتناغم مع المزيكا، و ده دور شادي وصفي اللي انضم مؤخرًا للفرقة و أصبح عضو أساسي لا غنى عنه. إختيارتهم كمان لنوعية الفيديوهات اللي تتعرض وقت الأغاني رائعة جدًا و متنوعة، من الأشكال المختلفة اللي ممكن تاخدك في جو تاني او اللقطات من الأفلام اللي بتخليك متصل مع اللي انت سامعه.

الحالة اللي بتعملها ديسكو مصر لازم تعيشها مباشر و هما بيلعبوا قدامك على المسرح، علشان كدة يوم الجمعة 12/7 لازم تحضر نفسك لحفلة إطلاق ألبومهم الرابع في جولف بورتو مارينا مع حسام حسني و مصطفي قمر وأيهاب توفيق وهاني الدقاق وهاني عادل و هيكون فيها مفاجأت كتير.
الحق اشتري تذكرتك من كل فروع تيكتس مارشيه او اتصل على 16826.

CNL Music
X