fbpx
ON STAGE

D-CAF 9th Edition 2021

2.61KViews

لأكثر من 3 أسابيع كانت منطقة وسط البلد في القاهرة مليانة فعاليات من أنواع مختلفة زي المزيكا و الرقص والعروض البصرية و عروض الواقع الافتراضي، كانت بتجمع أكثر من 50 فنان من مصر و فرنسا و سويسرا وتشيلي ودول تانية مختلفة، و خلال الفترة دي قدر أكتر من 3500 شخص من مختلف الثقافات يحضروا المعارض المختلفة و يستمتعوا بيها، ومن أبرز العروض دي و اللي شدت اهتمام ناس كتير :

–  تنسى كأنك لم تكن

تنسى و كأنك لم تكن كان عبارة عن رحلة مصالحة مع الذات و الماضي في أروقة سطح مبنى الشوربجي في وسط البلد، و بداية من اختيار المكان للديكور لأشعار محمود درويش اللي كانت بتشتغل في الخلفية و الهدوء اللي كان بيغلب على المكان في أغلب الأوقات حتى وقت الزحمة، كل ده ساهم في اكتمال التجربة و الاتصال مع الذات والاستمتاع بكل التفاصيل الموجودة في المكان.
وانت بتتمشى في أروقة المعرض هتحس كأنك رجعت بالزمن للقاهرة في فترة الثمانينات و التسعينات و هتسرح كتير في التفاصيل اللي حواليك.

–  فنون الميديا الحديثة

في نفس المبنى اللي كان بيحصل فيه معرض “تنسى وكأنك لم تكن” كان فيه 3 عروض بيحصلوا برضو و كان بيجمع بينهم شيء واحد وهو استخدام التكنولوجيا في عرض الفن بطريقة مختلفة عن المعتاد…

• NYX

من فكره و ابتكار رسام الرسوم المتحركة مارسيل إندريشتياك و بالتعاون مع المركز الثقافي المجري، العرض كان تجربة مثيرة تقدر تشد انتباهك بسهولة و تخليك تركز معاها و متحمس تعرف النهاية.

• 𝐕𝐑 𝐄𝐱𝐩𝐞𝐫𝐢𝐞𝐧𝐜𝐞

الواقع الافتراضي فتح مجالات لا محدودة لكل الفنانين لخلق العالم الخاص بيهم و التحكم بكل تفاصيله، و فريق معرض دي-كاف قدروا بالتعاون مع المعهد الثقافي الفرنسي انهم يوفروا لنا 10 أفلام بتقنية الـVR قادره بكل سهوله تاخدك من الواقع المحيط بيك و تنقلك لعالم تانى غني بالتفاصيل.

• احتضان

في 13 لوحه فنيه هتشوف أشخاص/حيوانات بيحضنوا بعض في حالة بتبعث السلام الداخلي و الطمأنينة، وعلشان فيه تفاصيل كتير مش بنشوفها من نظره، كان زوار المعرض يقدروا ينزلوا تطبيق خارجي على موبايلاتهم و عن طريقه هيقدروا يشوفوا اللوحات دي بطريقة مختلفة وبتفاصيل أغنى عن النظرة الاولى، بشكل عام المعرض كان تجربه دافئة و فريد من نوعها في مصر!

– أكزاك

أكزاك هي كلمه تركية الأصل بمعنى “العرج”، و في الموسيقى العثمانية كان بيستخدم المصطلح ده لوصف عدم الثبات والانتظام في الإيقاعات، العرض كان من نوع الفنون الأدائية و تقديم فيا دانس و هيلا فطومي و إريك لامورو بالتعاون مع 12 راقص في عرض كان مليء بالموسيقى التجريبية و الجرأة في تجربة ايقاعات جديده و متنوعه.

–  كو شن مون

فرقة كو شن مون بدأت في سنة 2017 كتعاون بين الموسيقار الفرنسي أكسل مون و الفنان نيكو ِشـن، و نجحوا الاثنين يقدمو لنا انتاجات موسيقية مليئة بالحرية الإبداعية في تجربة أنواع جديدة و خلق مزيج فريد بين الاصوات الشرقية المتمثلة في الآلات الوترية الشرقية و اصوات موسيقى التكنو العالمية وعلى ساحة روابط للفنون بوسط البلد اجتمع الاثنين علشان يلعبوا لايف لأول مرة في مصر.

–  ذكريات لورد

وختام فعالية دي كاف كان عرض فنون أدائية مبهر على مسرح الفلكي أشترك فيه 35 راقص يرقصون على انغام موسيقية من تأليف لفرانسوا كافين في عرض استمر لمده ساعه متكون من 3 فصول بيحكوا قصة صراع بين بطل مكافح بيجتهد على يوصل للمجد في حياته و طاغيه هدفه الوحيد نشر الفوضى والعشوائية في العالم، و بنشوف في النهاية النصر هيكون لمين فيهم.