fbpx
NEW MUSIC

ابيوسف وبيري – مملكة

4.74KViews

من وقت إعلان ابيوسف عن الالبوم الجديد اللى بيجهز ليه و بعدها الإعلان عن التراك ليست بتاعه الألبوم اللى أتفاجئنا بيها بوجود تعاونات مع ناس زى مروان بابلو و بيرى و من وقتها و احنا كنا فى انتظار الإصدار الرسمى للتعاونات دى، و بالفعل و بدون أى مقدمات أبيوسف أعلن عن كليب جديد لتراك “مملكة” بالتعاون مع بيرى… فيلا بينا نشوف التراك بيقول ايه

التراك جاى من انتاج أبيوسف و من بدايه المزيكا وانت هتحس ده لوحدك و باسلوب ابيوسف فى الإنتاج الموسيقى اللى متغيرش كتير عن زمان و مازال محتفظ بتميزه في المشهد… مع هندسه صوت من اسماعيل نصرت قدروا الاتنين يطلعولنا بيت متناغم بيسهل تجربه الاستماع للتراك بشكل كبير!

ما بنكرش إني مجنون بس إيه الغرض

ما يغيرش إني في الجيم دا هدمرك

شات روكات أنا هقدرك

لو عداد أنا أصفرك

بالاضافه للتناغم ده فى المزيكا فأبيوسف هنا قدم لنا فيرس قوى مليان باللعب فى الإيقاعات “الرايم سكيمز” الاحترافيه، و فى نفس الوقت الاسكليز اللى أبيوسف بيظهرها هنا في الكتابه متغيرش من انك هتبقى عارف تجمع أفكار و تفهم أبيو كان قصده ايه، وده شيء متوقع من ابيوسف خصوصاً ان ده ملعبه من زمان!

و أبيو بيأكد انه ثابت على مستواه بالرغم من كل اللى مر بيه و انه ليه أكتر من 10 سنين فى مشهد الراب الأ انه لسا متفوق على “أخصامه” و فى القمه…

فيرس بيري

من بدايه ظهور بيري فى مشهد الراب المصرى من أكتر من سنه بتراك “اناكوندا” بالتعاون مع الوايلى و احنا كلنا حطينا عليها أمال و طموحات كبيره و بالفعل مع الوقت بيري قدرت تثبت انها جديرة بالآمال دى و خصوصاً بعد اصدارها للـLP الخاص بيها “12:01 AM”.

تبص تقول البت دي أيقونة

اللعبة Queen تبص تقول

كل تراك ينزل تعلى

وڤيرس كتابتي ويوسف على البيت

وتعاون بيري مع ابيوسف فى “مملكة” مكنش استثناء للقاعده دى، بيري قدرت تواكب أبيوسف فى مستوي كتابته و حضوره على البيت، و الاتنين مع بعض يعتبروا مزيج فريد مش بنسمعه كتير فى المشهد المصرى و نتمنى يتكرر أكتر…

Dir. Mohsen Sherif

فوق التجربه السمعيه الرائعه دى فانت عندك تجربه بصريه متقلقش حاجه عن التراك، محسن شريف مخرج الكليب قدر يستغل التراك بالشكل الامثل فى خلقه للتجربه البصريه من ناحيه اختيار أماكن التصوير و الديكورات و توظيف أبيوسف و بيري بشكل مثالي فى اللقطات، وده اللى يديك احساس ان الكليب بسيط بس لو ركزت فى تفصيله هتلاقى عكس كده تماما!