عرفة | ليجي سي

 عرفة | ليجي سي
Spread the love

بعد رجوع ليجسي للسين من اعتزاله بالبوم ” بلان بى ” و بعدها اصدار تراك “تاني” من فتره قريبه، كان لازم ليجسي يستغل النشاط اللي هو فيه ده ويقدم لنا حاجة قوية تثبت ان كل ده مجاش حظ أو مجرد صخب رجوعه للراب سين و بالفعل ده حصل مع فيديو كليب “عرفة” اللي شوفناه للمره الاولى في اول ليلة من ليالي البطرون على مسرح الزمالك و بعدها بكام يوم نزل على اليوتيوب.

تراك “عرفه” يعتبر مقدمش كتير لليجسي خصوصاً اننا شوفنا اللون ده كتير منه، بس في نفس الوقت التراك ممتع و تقدر تحطه على الريبت بسهولة و فضل كبير فى الحته دي يروح لإنتاج التراك اللي كالعادة جاي من ليجسي، اللى قدر يقدملنا تراك متوازن لحد كبير و متحسش ان البرودكشن مغطى على الفوكلز ولا الفوكلز مغطية على البرودكشن، و ليجسي يعتبر من الناس القليلين حالياً اللى بيعملوا  بروداكشن لنفسهم فى المشهد المصرى ودى حاجه مش سهله إطلاقاً بس بتدى الارتيست حرية أكبر في اختيار كل حاجه فى التراك و بتساعده انه يطلع تراك متوازن.

مبنعطلش و مش مُعضله “

مبنعطلش و مش مُعضله

 “مبنعطلش و مش مُعضله

كليب عرفة

كليب عرفه جاي من اخراج اسلام ابو العنين الى شوفناه قبل كده فى المشهد بكليب “جو أرض” اللي كان بالتعاون مع شب جديد و مولوتوف، و بطولة الممثل “على قاسم” اللى يعتبر ده أول ظهور ليه  فى الراب السين، و الحقيقه الكليب مكنش اختيار موفق للدرجة، الكليب جميل و سينمائي بطريقة أكبر من التراك نفسه، فى اول مره شوفت فيها الكليب كنت فاكره اعلان لفيلم من بطولة “علي قاسم” و قعدت أسأل نفسى هو ايه علاقه اللي بيحصل ده بالتراك؟ و موصلتش لحاجه.

 الكليب بيحكى قصة ملهاش علاقه بالتراك و مقدرتش اندمج معاه، و فكرنى بكليب “نهاية العالم” لما نزل وانه برضو كان بيحكى حكايه ملهاش اى علاقه بالتراك و النوع ده بالرغم من انه منتشر عالمياً، بس هو للأسف مش بينجح مع الجمهور المصرى زى مشوفنا لما مروان موسي اضطر انه يمسح كليب “نهاية العالم” من على يوتيوب. 

و من الناحيه الفنيه فالكليب جميل جداً و اسلام ابو العنين بذل مجهود واضح علشان يطلعنا منتج مميز فى الاخر خصوصا فى الكادرات و الالوان و الاستايل.

كليب “عرفة” يعتبر محاوله جديده لتقديم فكرة “Narrative Music Video” للمشهد المصرى من جديد، فتفتكروا هتنجح المره دي؟

Related Articles