fbpx
NEW MUSIC

عفرتو – فرق خبرة

2.54KViews

من 2020 و مشهد الراب المصري مستمر في النجاحات و توصيل ثقافة الهيب-هوب لأكبر عدد من الناس، وده شوفناه بيتحقق فى حاجات كتير منهم ظهور رابرز فى الحملات الإعلانية لمنتجات مختلفة و دخولهم عالم السينما سواء كتمثيل زى مـ شوفنا مع كردى و ويجز أو الاغانى الدعائية للأفلام… و تراك “فرق خبره” مكنش استثناء للقاعدة دى!

فيلم فرق خبرة

الفيلم بيدور حول شاب اسمه ناجي و بيقابل سلمى بشكل مفاجئ و يبدأوا مع بعض رحلة جديدة للهروب من المشاكل المحيطة بيهم و بنشوف طول الفيلم المشاكل دى بتتطور ازاى و ناجي و سلمى بيتعاملوا ازاى معاهم و المغامره بتاعتهم هتخلص ازاى.

وده اللى فعلاً قدرت اتوقع ان الفيلم بيدور عليه لما سمعت التراك لأول مرة، ودى نقطه تتحسب لعفروتو انه عرف يحققها خصوصاً انها مش بالسهولة اللى ناس كتير متوقعينها.

الإنتاج الموسيقي هنا كان جاي من ايد كولبكس اللى قدملنا قبل كده هيتات كتير و مش مستبعد يكون التراك ده واحد منهم، اول كام ثانيه فى البيت هتحس انك مستنى حاجه و متوتر خصوصاً مع حركة الكاميرا ببطء حول عفروتو و تعبيرات وشه الجامدة في المشهد، بس بعدين المزيكا كلها بتوقف و يبدأ التراك تانى مع اصوات جديده المره دى… و المزيكا هنا مدية مساحة لعفروتو يستعرض مهاراته فى الراب، فهنا بنشوف عفروتو بيغير طبقة صوت 3 مرات تقريباً ما بين الكورس و الفيرس الاول و الفيرس التاني و دى من النقاط المميزة فى عفروتو و بيعرف يستغلها بشكل كويس فى أغلب انتاجاته.

صعب تقرا ان كله فطره

شكلي تايه مش عندى خطه 

شخصيتي تلمه…بارده سنه

و انا اقوى منك فىه فرق خبره

عفروتو من بداية السنة وهو مستمر فى تحقيق النجاحات و التراك ده اكيد هيتضاف لـ ليستة النجاحات دى ، نجاح عفروتو مكنش متوقف على الإصدارات بس، فبعد نجاح عفروتو حفلته الأولى على مسرح الزمالك أغسطس اللى فات، يستعد عفروتو لإحياء حفلة جديدة فى المسرح يوم 12 نوفمبر القادم!