INTERVIEWS

Lege-Cy – ليچيسي

2.76K

شوفنا في خلال السنة الأخيرة ظهور قوي منك و كثافة في الأغاني، فـ قبل ما نتكلم عنها بالتفصيل عرفني اكتر عنك وعن أنشطتك في مشهد الراب.

-انا اسمي محمود اسامة عبد العزيز، عندي ٢٣ سنة من طنطا. بدأت اكتب راب في ٢٠١٠ بس وقتها مكنتش بسجل لأن مكانش في امكانية اعمل ده وقتها، لأن مكانش فيه استديوهات في طنطا او امكانية اني اعمل استوديو لنفسي وقتها. كنت وقتها لسه بادئ بتعلم الكتابة و بحاول اسمع الناس بره و اشوفهم بيعملوا ايه، بس لظروف خارجة عن ارادتي بطلت راب و رجعت تاني في ٢٠١٣. بس مكنتش حابب تكون بدايتي اعمل اغاني علي free beats من ع النت و علشان كده قررت اني اتعلم بروداكشن.

خلينا نرجع للبداية بتاعتك، ازاى بدأت؟ او بمعنى اوضح ليه اخترت طريق الراب.

بالصدفة، في ٢٠٠٩ كنا قاعدين انا و اتنين صحابي في العربيه و حد شغل اغنية Lose Yourself بتاعه Eminem ، و الحقيقة طريقته شدتني جداً و حبيتها، بس مكنتش اعرف ايه نوع المزيكا دي، و لما سألت اصحابي قالولي ان ده اسمه راب و كنت وقتها في فرقة كورال المدرسة و سيبت الفرقه بسبب ان كان حلمي اكون مؤثر .. و اكيد الكورال مش هيوصلني للي انا عايزه و ساعتها حطيت الموضوع في دماغي.

مؤثر في مجال المزيكا؟!

-في الحياه عموماً، بس الأخص المزيكا.

ازاي اتعلمت تبني اغنية؟

-بمعني ؟

انك تألف كلمات و على اساسها تضبط البارات و بعدين تضبط دة كله على الإيقاع.

-سؤالك يعتبر مجاوب الموضوع، الموضوع مكانش سهل، التراك زمان كان يعتبر “بالنسبالي” كتابة جمل بقافية تمشي مع المزيكا و خلاص، و اللي فهمته بعد كدة ان التراك المفروض بيتقسم، أول حاجه إنترو و بعدين يجي بعدها ڤيرس و بعدها كورس و ڤيرس تاني و هكذا، بس زمان الموضوع كان محدد ان الڤيرس ١٦ سطر بس و الكورس ٨ سطور، او ٤ و يتعادوا مرتين بس مع تطور المزيكا مبقاش الموضوع محدد او ليه معايير معينة.

انت كان ليك بيتات instrumental على ساوند كلاود قبل ما تبدأ تنزل اغاني راب، ف من امتى بدأت تعمل بيتات؟

-أول بيت عملته كان في ٢٠١٣ و بعدها عملت البومين بيتس محدش سمعهم لأن وقتها مكانش فيه Hiphop producers موجودين في مصر كتير،  بمعنى ان اغلب الرابرز في مصر يعتبر مكانش عندها علم ان في بروديوسرز مصريين بيطلعوا مزيكا بقوة المزيكا اللي بتكون موجودة على النت، و فضلت انزل بيتس علي Soundcloud و أخر بيت نزلته كان في ديسمبر ٢٠١٧.

انت رابر و بروديوسر، فـ هل شايف ان ده بيخرج شئ نموذجي؟ و على اي اساس بتشوف نفسك اكتر، رابر ولا بروديوسر؟

-حاجه قوية جداً لما تكون بتغني علي المزيكا بتاعتك اللي انت عاملها بإيدك، لأن في الغالب محدش هيقدر يوصل الكلام او المزيكا غير الشخص اللي عاملها لأن الكلام “بيكمل” المزيكا و المزيكا “بتجمل” الكلام و انا شايف نفسي في الاتنين.

خلينا نتكلم عن خطوات صُنع الأغنية، إنت بتشتغل بـ إيه علشان تعمل مزيكا؟

-انا بشتغل على Fruityloops و لو هنتكلم عن الموضوع من بدايته ابتديت في الأول باللاب توب بس علي برنامج Fruityloops ، بعد كده جبت أول controller ليا و كان Maschine MK2 في ٢٠١٤ ساعدتني كتير في الأنتاج بجانب اني بقيت بطلع حفلات اعمل Live Performance بيها و دي كانت مرحلة فارقة جداً في حياتي.

ازاي بتاخد قرار انا هكتب اغنية، يعني هل لازم حاجة تحصل معاك او موقف يأثر فيك، ولا هو قرار و خلاص او بتستنى الإلهام؟

هو الإلهام اكيد كان مهم في فترة، بس دلوقتي انا بقيت بهتم و اركز اكتر في المواقف و الاحداث اللي بتحصل في حياتي عموماً، زمان كان ممكن استني لحد ما اخد قرار لأن مكانش في جديد او احداث او مواقف كتير فـ كان ممكن انزل اغنيتين كل سنه مثلا.

لكن دلوقت الوضع مختلف؟

-كتير

ايه اللي اختلف عن زمان؟

الطبيعي جداً إن الواحد بيكبر و كل ما الوقت بيعدي يتعرف على ناس اكتر و دايرته بتكبر فـ بالتالي بيمر معاهم بمواقف و احداث مختلفة بتأثر فيه او بتأثر فيهم، و انا بشوف ده دافع ليا بيخليني انتج اغاني اكتر.

شايف ان الأحسن من الفنان انه يركز على الكلمات ولا البيت اكتر؟!

-الاتنين مهمين جداً في نجاح أي أغنية.

اكتر اغنية اخذت منك مجهود، و المفضلة ليك؟

اكتر اغنية اخذت مني مجهود كانت “اتنين بليل”، لإني اشتغلت عليها ٧ شهور متواصل و عملت لها اكثر من ٥ بيتات مختلفة. و اكتر اغنية مفضلة ليا هي “كذا و كذا”.

لما بتخلص اي اغنية، مين الشخص اللي لازم تشوف رأيه؟!

بسمّع اصحابي القريبين مني و اللي منهم ناس ليهم في المزيكا و منهم اللي ملهمش، لأن رأي الاتنين مهم جداً بالنسبالي.

ايه المزيكا اللي تلهمك؟ و مين الفنانين اللي أثروا فيك؟

-بسمع Lo-fi, Jazz, Blues, Soul
و ممكن نقول من الفنانين
Marvin gaye, Abyusif, Russ, The Weeknd, Tory lanez, Frank ocean

انت دلوقت شايف مشهد الراب في مصر كان فين و بقى فين؟!

-فرق كبير، المشهد عموماً زمان مكانش مسموع زي دلوقتي، بعيداً عن ان كان في ناس ليها وزنها في المشهد لكن الفترة اللي احنا فيها دلوقتي بقت مواكبة أكتر كتطور في المزيكا على المستوى العالمي.

شايف ايه المقارنة بينه و بين مشهد الراب في أي دولة عربية تانية؟!

-اكيد في فرص كتير لظهور وجوة جديدة برة اكتر من مصر، المغرب هي الرائد في دخول النيو سكول للعالم العربي، بس دة ميمنعش ان مشهد الراب المصري بدأ ياخد حقه في الفترة الأخيرة و الناس اللي بتسمع بدأت تزيد كل يوم عن اللي قبله و دي حاجة في مصلحة الـ Hip Hop scene المصري.

و اخر سؤال، اديني فكرة عن اللي جاي؟ لليجيسي بشكل عام وعن شايف نفسك فين؟

اللي جاي تراكات اكتر من قبل كدة و هيكون في كذا تعاون مشترك بيني و بين فنانين كتير في المجال و برة المجال كمان، و كل اغنية مش هتكون شبه اللي قبلها سواء توزيع أو اداء أو كلمات.
– شايف نفسي فين ؟
“بفتح بيبان الطيارة و بنط قفزة ثقة هنزل منها على ستيدچ فوق برج”

X