INTERVIEWS

كبير الكهنة | ياسين زهران وبودكاست تحت الأرت

3.56K

حوارنا مع “ياسين زهران – كبير الكهنة” عن بودكاست “تحت الأرت” أول بودكاست مختص بالراب العربي بيستضيف رابرز وصناع الموسيقى المؤثرين في المشهد المصري، وكل من يستحق فرصة الظهور في الساحة.

  • أولا برحب بيك،  من حوالى 20 سنة أنت و”عمر بوفلوت” روحتوا كافيه فى سموحة علشان تغنوا راب لأول مرة، دلوقتى قاعدين فى بودكاست بتسمعوا شباب جداد بيتكلموا وبياخدوا من خبرتك في المجال، فى رأيك إيه إللي اتغير فى المدة دي كلها؟

إللي اتغير إن الراب دلوقتى بقى يدخل فلوس ويعتمد عليه كمصدر دخل وأي حد بيراب دلوقتى بقى  هدفه 4 حاجات؛ 

١- يعمل شهرة ويتشهر

٢- يسيب بصمة للجيل، الجيل إللي هو فيه

٣- يورى الجيل الأقدم منه إنه قوى وليه اسم

٤-  يتوسع فى مجالات تانية زى الإعلانات، الشركات، الأفلام..

  • إيه الصعوبات إللي كانت موجودة زمان؟

صعوبات زمان كانت الإمكانيات والتكنولوجيا وعلشان تعمل تراك وتسجله ديه حاجة صعبة ومكلفة،  وكنا بناخد الموضوع  بهزار وضحك وبنجرب جنب شغلنا أو كليتنا لو لسه بندرس وكمان ماكنش  عارفين نتواصل مع الناس، بمعنى أدق مش عارف مين جمهورك.

  • دلوقتى شايف إن فى صعوبات موجودة ولا التكنولوجيا قضت على الصعوبات دي؟

التكنولوجيا قضت على الصعوبات التقنية بس فى صعوبات برضه.
الصعوبات حاليا تتلخص في المركزية فى القاهرة واسكندرية  بس، مدن الصعيد تقريبا مفيهاش ستوديوهات وفى الأول والأخر أنت مش هتقدر تعتمد على مايك الموبايل، لازم تسجل بصوت بكواليتى كويسة علشان تتسمع.
حاليا في المشاكل النفسية فى إنك مش عارف توصل أو دايما بتقارن نفسك بناس تانية؛ ده جاب كام فيو وأنا جبت كام، وده بيعمل مشكلة ليك فى تقديم فنك للجمهور. الجمهور كسول مش بيحب يخرج بره إطار معين فى المزيكا لازم تشده ليك وتجبره إنه يسمعك لأخر.

  • إيه اللى بيعطل الفنان فى رأيك إنه يكمل؟

بص، أنا من رأيي إن الفنان لازم يمسك العصاية من النص، ولازم يعبرعن نفسه بس بشكل برضو  يرضى الجمهور.. معادلة صعبة.

  • طيب مين اللى حققوا المعادلة الصعبة دي؟

أبيوسف، بابلو، وشاهين.

  • بتسمع إيه في العادي؟

بسمع كل حاجة موجودة تقريبا مش ببقى محجم نفسى بنوع معين، ودي نصيحة بقولها لأى حد يقولى أنا مش عارف اكتب دايما بقوله اسمع من أول الأغانى الشرقى بتاعة أم كلثوم لحد تراكات الميتال والروك والجاز.

  • شايف التكنولوجيا حاجة حلوة ولا وحشة؟

كل حاجة حلوة ووحشة. التكنولوجيا بتسهل فى حاجات كتير بس برضه أحيانا بتطلع ناس مرة واحدة، الفن حاجة بتعبر عن وجود الشخص، عن احاسه، مشاكله وعن أى حاجة، ولازم الشخص ده لما بينزل أى تراك يبقى متقبل إن في نقد ليه وإنه ممكن يبقى مش حلو المهم إنه يسمع.

  • بمناسبة الكلام عن النقد وبما إنك إشتغلت ناقد إيه رأيك فى  ثقافة النقد؟

بص المجتمع المصرى أصلا مش متقبل للنقد عموما ولكن الصراحة، أحيانا بننقد غلط لأننا بننقد شخص مش أغنية واحدة والناس عموما بتحب التعميم جدا مش معنى إني محبتش أغنية معينة لحد إن باقى أغنايه مش حلوة.

  • ليه وقفت راب؟

مشاكل الحياة، بعد ماخلصت جيش دورت على شغل وسافرت وبعديها الجواز ومسئوليات الحياة من   2008 ل 2010 كنت ببعد تدريجى كنت بسجل ساعات لما بروح الأستوديو لما بنزل إسكندرية أجازة لكن من 2010 لحد 2014 أنقطعت تماما.

  • وإيه اللى حصل فى 2014 ؟

سمعت ألبوم أبيوسف وعملت مراجعة عنه على بيدج الفيسبوك، وقتها حد شافه فى معازف وبقيت معاهم ووبعدين روحت الفصلة ورجعت المجال تانى.

  • لقب كبير الكهنة جه منين ؟

ده كان مجرد بار فى أغنية ملوك إسكندرية لحد ماواحد مرة لما نزلت على الفيسبوك مراجعة ألبوم أبيوسف قالهالى فى الكومنتس وعجبتنى بصراحة.

  • فى الوقت ده كله مفكرتش ترجع تانى وتسجل؟

طبعا فكرت وفيه مشاريع تراكات كتير كنت هعملها بس وقفت زى الطوفان 2 ولو فاكرين وكان أبيوسف هيشترك فيهم بس الأمور مكملتش. 

  • بتحس بإيه لما رابرز صغيرين فى السن ياخدوا خبرتك؟

بحس بسعادة إن حد بياخد رأيي  بس بصراحة بحس بخوف علشان كده بحاول أوزن الرأي لأى حد عمل تراك علشان ميبقاش رأيي ليه صادم وأبقى السبب فى إحباطه.

  • إيه رأيك فى الراب سين دلوقتى؟

الراب هو تريند وده أكتر حاجة مضايقانى وأنا شايف أنه لازم يبقى ليه أهمية كنوع من أنواع الفنون مش مجرد حاجة بتاخد وقت وده بيخلى الراب يموت ومع الوقت هيقل خالص.

  • هل قلقان على مستقبل الراب؟

لا.. لأن الراب نوع بيطور نفسه لأنك بتعملها بمزاج وممكن تتكلم فى إللي أنت عايزه على طول وعلى طول فى لغة لأن لغة الشارع بتتطور وكمان الراب معتمد على الكلام مش معتمد على وتريات أو أصوات مع الوقت أنت بتجيب آخرها.

  • فى رأيك مشكلة الناس مع الراب إيه؟

الناس فاكرة إن الراب سهل كلمات على وزن وقافية وبيت سريع لكن الراب أعمق من كده وده السبب إن فى ناس بتختفى بسرعة ومحدش بيسمع عنها وناس بتفضل، وإللي بيفضل هو إللي بيطور نفسه يوم عن التانى وبيبقى عارف هو عايز إيه كويس.

  • البودكاست مين صاحب فكرته؟

البدابة كانت مع مباشر من تحت الأرت وكانت أصلا صدفة، وبعد كده  كنت عايز أعمل حلقات جديدة ولحد ماعرضت الفكرة على “كوكب الأرت” وبدأنا شغل وطلع بالشكل ده، وإختيار إسم “تحت الأرت” كان لأنه جزء من الكيان ده.
وكانت حاجة كويسة لأنها طلعت فى الوقت ده بعد شهور كتير من التعب.

  • تقدر تسميه بودكاست مرئى؟

أكيد.. لأني كنت عايز أصوره لكن لأن الصوت كان كويس عشان المعدات كويسة عمر وشاهين اقترحوا إن كمان ننزله على كل المنصات السمعية ومواقع صوتية تانية.

  • من الأول كنت مقرر عمر يبقى معاك؟

آه عمر فى دماغى من الاول خالص.. هو co host معايا لمجموعة حلقات وهو بيفيدنى جدا إن الحلقة تمشى كويس.

  • هل ممكن تعتمد على حد غير عمر؟

ممكن  بس  قدام  شوية اعتمد على co hosts  تانين بس أهم حاجة أكون قادر أتفاعل معاهم وفاهمين بعض زيي أنا وعمر علشان الحلقة تمشى كويس.

  • بتحضر للحلقة إزاي؟

بحضر عناوين رئيسة بس وبرميها على صيغة سؤال، بنمشى الموضوع كأننا قاعدين على قهوة، بيكون في أكيد عشوائية شوية بس أنا باخد من العشوائية دي وبخليها تبقى بشكل منضبط.

  • إيه هدفك من البودكاست؟

 عايز اتكلم عن الصناعة ككل فى البودكاست، مش الراب بس، الهيب هوب عموما و بدل مايكون شخص هو إللي متصدر المشهد لا اتكلم عن الأفراد زي الميوزك بروديوسر ومهندس الصوت وكل الناس المسئولة.

  • ممكن نتكلم عن علاقتك بعمر بوفلوت؟

 علاقتى بعمر بدأت قبل مانغنى بكذا سنة وعلاقتي بيه ممتدة مش مجرد عملنا فريق سوا ووقفنا لا أنا أقدر أقول عليه صديق حقيقي مش مجرد زميل شغل يعنى.

  • آخر سؤال، إيه الجديد إللي جاي؟

بودكاست شعبى عن المهرجانات وصناعها والموسيقى الشعبى عموما وفيه شوية أفكار تانى بس لحد الآن موصلتش لحاجة فيها.

وأكيد تفاصيل البودكاست الجديد هتكون عندنا.. شكرا كبير الكهنة!!

X