دليل حفلات الويك ايند

 دليل حفلات الويك ايند
Spread the love

الشتاء لسا داخله و السنه قربت تخلص و شهر 12 كالعاده مليان حفلات بتحصل فى كل مكان… و علشان كده احنا هنا هنجمع كل معلومات الحفلات دى فى مكان واحد علشان تعرف تقضي الويك اند فين من غير مجهود!

الخميس 

بدايه الويك ايند و الناس لازم تخرج و تنبسط و يوم الخميس عمره ميخيب معاك فى الموضوع ده… فلو انت بتحب المزيكا الالكترونيك فـ فى كايرو جاز كلوب 610 الاسبوع ده فالـ #ElectricThursday هيكون موجود اتنين من أحسن الـDjs فى مصر سيبز و عشماوي فى B2B سيت مميزة … و كايرو جاز العجوزة الاسبوع ده فى الـ #ThursdayNightLive هيكون موجود Vybe و AWE و سهره متنوعه مبين مزيكا البوب و الفانك… و لو حابب تاخد جرعه مزيكا شرقي و طرب فـ فيه حفله لمدحت صالح بالاشتراك مع مروة ناجى على مسرح الناركى فى كايرو فيستفال سيتى …

و الساقيه هتستضيف الفنان وائل الفنشي مغني الطرب الشرقي فى حفلتين جداد يوم الخميس برضو و حفله كمان لفريق بابيون فى الساقيه برضو… و دار الاوبرا المصريه هتسضيف اسطورة الجاز المصرية الفنان يحيي خليل في حفله جديده…

و دار الاوبرا المصريه برضو هتسضيف حفله اوركسترا مميز جداً بقياده المايسترو ناير ناجى و حضور خاص لدنيا الوديدى و الشيخ ايهاب يونس، و باين من اللاين اب ان الحفله دي هتكون مميزة جداً …

نروح للجمعه 

حفلات يوم الجمعه هتكون متنوعة مبين بوب التسعينات و مزيكا التكنو و طرب و ابتهال و فولك ميوزك!… 

على الهلباوى في حفله جديدة فى ساقيه الصاوى الساعه سبعه و نص و اروع اغانى الطرب العربي… و فى روم ارت سبيس جاردن هتلعب باند “استبينا” مع سهره مميزه جداً من مزيكا الفولك هتبدأ الساعه 9 بليل…

و كايرو جاز كلوب العجوزة هيلعب الثلاثى المميز SeifO و أحمد عيد و عمر شريف فى سهره مليانه مزيكا تكنو مبتخلصش… و لو بتفكر ترجع بالزمن للتسعينات فكايرو جاز 610 هيستضف يوم الجمعه باند BubbleGum Kollectiv و هترجع بالزمن 30 سنه لورا فى ليله مليانه نوستالجا و رقص!

و كمان فيه حفله تكنو تانيه للـDj الفلسطنيه سملي عبدالهادى فى Tempo EGY فى اول حفله من سلسله الـKltr Shck#…

و بما ان الكريسماس قرب خلاص فـ ممكن تروح الاماكن دى و تستمتع بمزيكا الكريسماس من باند 404 اللى هيلعبوا حفله جديده يوم الجمعه فى ديستنجوه التجمع الاول و الدخول مجانى!

و محبي الجاز هيعرفوا يستمتعوا بيوم الجمعه بطريقتهم الخاصه ويحضروا لباند Boghdady Big Band فى دار الاوبرا المصريه فى حفلة الكريسماس الخاصه بيهم!

و اخيراً السبت…

ديماً يوم السبت بيكون أزحم يوم فى الويك ايند… و الحفلات مش استثناء من القاعدة دى! 

اليوم مش هيكون زحمه وبس ده هيكون متنوع بشكل كبير كمان… من اول جرعه مزيكا الديسكو و النوستالجا اللى هناخدها من ديسكو مصر على مسرح الزمالك يوم السبت الساعه 7 … لحد مزيكا الفولكور السودانى بصوت اسيا مدنى فى كايرو جاز كلوب العجوزة…

و محمد سعيد و ليله مليانه مزيكا R&B فى الساقية… و فى كايرو جاز 610 بعد غياب لاكتر من سنتين اخيراً ايفنت ‘Hey DJ’ راجع تانى بشكل قوى و اللاين اب قوى جداً مكون من سيبز و احمد عيد و عشماوى مع ميستي و A-Squared و مزيكا لحد الساعه 1 بليل!

Related Articles